Əziz səyahətsevərlər, Avropada həm günəşin, həm mədəniyyətin, həm də ləzzətli yeməklərin bir arada olduğu nadir ölkələrdən biri varsa, o da şübhəsiz İspaniyadır. Əgər siz də həm dincəlmək, həm görmək, həm də yaşamaq istəyirsinizsə, İspaniya sizin üçün ideal seçim olacaq. Bu ölkə təkcə səyahət deyil – bir təcrübədir, hissdir, həyat tərzidir.
İspaniya özündə çox şeyləri birləşdirir: Barcelona-nın incəsənət dolu küçələri, Madridin zəngin muzeyləri, Sevilyanın rəqs və musiqi ilə yaşayan ruhu, Malaganın dənizlə iç-içə sakitliyi və Valensiyanın portağal qoxulu havası... Burada hər şəhər fərqli bir duyğudur, hər küçə isə hekayə danışır. Hər addımda tarixə, mədəniyyətə və qonaqpərvər insanlara rast gələcəksiniz.
Bütün bunlarla yanaşı, İspaniya Şengen zonasına daxil olduğu üçün viza ilə getmək lazımdır. Amma narahat olmayın doğru məlumat və düzgün sənədlərlə bu prosesi asanlıqla keçə bilərsiniz. Aşağıda viza haqqında geniş məlumat da sizinlə bölüşəcəyik.
İspaniyaya Səfər Üçün Ən Yaxşı Mövsüm Hansıdır?
İspaniyaya səyahət üçün demək olar ki, ilin istənilən ayı münasibdir. Lakin səfər məqsədinizə görə fəsil seçimi dəyişə bilər:
- Yay ayları (İyun–Avqust): Günəşli hava, festivallar və çimərlik üçün ideal zamandır. Xüsusilə Barselona, Valensiya və Malagada dəniz tətili üçün əla fürsətlər var.
- Bahar və Payız (Mart–May və Sentyabr–Oktyabr): Havanın nə isti, nə də soyuq olduğu bu fəsillərdə şəhərləri gəzmək, muzeylərə baş çəkmək və yerli həyatla tanış olmaq çox rahatdır.
- Qış ayları (Dekabr–Fevral): Əgər turist izdihamından uzaq və daha ucuz bir səyahət istəyirsinizsə, bu dövr mükəmməldir. Üstəlik, qışda İspaniyanın bəzi dağlıq ərazilərində xizək sürmək də mümkündür.
İspaniyada Görmədən Qayıtmayın Deyəcəyimiz Yerlər
İspaniya o qədər zəngin və rəngarəng ölkədir ki, hansını görmək vacibdir demək çətindir. Amma gəlin birlikdə ölkənin ən simvolik, “görmədən qayıtmayın” deyiləcək yerlərinə baxaq:
- Barselona: Gaudinin əsərləri, Sagrada Familia kilsəsi, Park Güell və La Rambla küçəsi ilə sizi valeh edəcək. Arxitektura və dəniz bir arada!
- Madrid: İspaniyanın paytaxtı tarixi və müasirliyi bir araya gətirir. Prado Muzeyi, Kral Sarayı və Retiro Parkı buradadır.
- Sevilya: Flamenko musiqisinin beşiyidir. Tarixi küçələri, Alcazar sarayı və möhtəşəm Sevilya Katedrali ilə sizə başqa bir İspaniyanı göstərəcək.
- Valensiya: Sakit çimərlikləri, portağal bağları və Gələcəyin Sənətləri Şəhəri (City of Arts and Sciences) ilə diqqət çəkir.
- Granada: Ərəb təsirini hələ də daşıyan Alhambra Sarayı, dar küçələri və Sierra Nevada dağlarının yaxınlığı ilə unudulmazdır.
- Toledo və Córdoba: Tarixi şəhərlərdir. Xristian, müsəlman və yəhudi mədəniyyətlərinin bir araya gəldiyi bu şəhərləri gəzmək əsl tarix dərsidir.
İspaniya Vizası Almaq üçün Hardan Başlamaq Lazımdır?
İspaniyaya səyahət etmək istəyirsinizsə, ilk atacağınız addım İspaniya səfirliyi viza görüşü üçün appointment (randevu) almaqdır. Hazırda Azərbaycanda İspaniya vizası Capago Baku vasitəsilə təqdim olunur. Capago İspaniya səfirliyinin rəsmi viza xidmət tərəfdaşıdır və Şengen vizası üçün müraciətlər burada qəbul edilir.
İspaniyaya getmək üçün turist, təhsil, iş, və ya ailə birləşməsi kimi müxtəlif məqsədlərlə viza müraciəti edə bilərsiniz. Əgər İspaniya təhsil vizası almaq niyyətindəsinizsə, universitetdən qəbul sənədi ilə yanaşı sponsorluq məktubu və iş yerindən arayış da təqdim etməlisiniz. Bu sənədlər Asan Xidmət vasitəsilə notarial qaydada təsdiq oluna bilər.
Şengen viza qiyməti isə müraciət növünə və yaş kateqoriyasına görə dəyişə bilər.Ən çox soruşulan suallardan biri də Şengen viza qiyməti ilə bağlıdır. Hazırda viza rüsumu 35 avrodur. 2025 ən son Şengen viza rüsumları və müraciət prosesi haqqında ətraflı məlumat almaq istəyirsinizsə buraya klik edərək ətraflı məlumat əldə bilərisiniz.Əlavə olaraq Capago xidmət haqqı da nəzərə alınmalıdır ( Capago rüsum, müaricət prosesi üçün buraya klik edib ətraflı məlumat ala bilərsiniz)
Unutmayın ki, Şengen vizası aldığınız ölkədən ilk giriş etməyiniz tövsiyə olunur. Yəni əgər viza İspaniya səfirliyi tərəfindən verilibsə, səyahətiniz İspaniyadan başlamalıdır. Bu, gələcək müraciətlərdə sizin etibarlılığınızı da artıracaq.
İspaniya Viza Növləri
İspaniya Şengen ölkələri siyahısına aid olduğuna görə siz müvəqqəti səyahətinizi reallaşdırmaq üçün İspaniya Şengen vizasına müraciət edərək bu vizanı əldə edə bilərsiniz. Bu viza növünə müraciət səbəbləri turizm, ailə və ya dostlara ziyarət, işgüzar səfər, tibbi müayinə və ya müalicə, qısamüddətli təhsil, mübadilə proqramları və buna bənzər bir çox daimi olmayan nüanslar ola bilər. Əgər siz İspaniyada müddəti 90 gündən çox olan uzunmüddətli təhsil (bakalavr, magistr, doktorantura və s. kimi) almaq və ya burada yerləşən bir qurumda daimi işləmək istəyirsinizsə, həmin təhsil və iş qurumlarından rəsmi dəvət və ya qəbul məktublarınız olduğu təqdirdə İspaniya milli vizasına da müraciət edə bilərsiniz. Hazırda isə biz sizə İspaniya Şengen vizası haqqında ümumi məlumat verəcəyik.
İspaniya Şengen Vizası
İspaniya Şengen vizası təkgirişli və çoxgirişli ola bilər. Həmçinin, siz uzunmüddətli, yəni üç ay, altı ay, bir il, iki il və ya beş il müddəti əhatə edən vizalara da müraciət edə bilərsiniz. İspaniya Şengen vizasını almaq sizə səyahətiniz boyu bütün Şengen ölkələrinə qapı açır. Ancaq hər bir halda mütləq şəkildə biz məsləhət görürük ki, Şengen ərazisinə ilk girişinizi viza aldığınız ölkədən, yəni İspaniyadan edəsiniz. Əks halda siz viza müraciətiniz zamanı qeyd etmədiyiniz təqdirdə İspaniya vizası ilə Şengen ərazisinə başqa bir giriş etməyə çalışsanız, nadir hallarda da olsa, həmin ölkənin sərhəd xidməti sizi geri qaytara və ölkəyə girişinizə icazə verməyə bilər. Bu təcrübə bəzi hallarda yaşanıb və bu səbəblə də biz sizə bu riskdən qaçınmağı tövsiyə edirik.
Əgər siz İspaniya Şengen vizasına müraciət edirsinizsə, səyahətiniz boyu gün sayı olaraq ən çox İspaniyada qalacağınızı göstərməlisiniz. İspaniyadan əlavə Fransa, Portuqaliya, İtaliya və digər Avropa ölkələri də bir çox şəxs tərəfindən səyahət tur planlarına əlavə edilir. Bu kimi hallar sizin viza müraciətinizdə heç bir problem yaratmayacaq nüanslardır. Sadəcə ümumi səyahətiniz müddətində ən çox qalacağınız ölkəni İspaniya göstərməyiniz İspaniya Şengen vizasına müraciətiniz üçün yetərli olacaqdır.
İspaniya Şengen Vizası Müraciəti üçün Sənədlər Toplusu
İspaniya Şengen vizasına müraciət edərkən siz aşağıdakı sənədləri təqdim etməlisiniz:
- Xarici pasportunuzun orijinalı və birinci səhifəsinin surəti
- Əgər varsa, əvvəlki vizalarınızın və giriş-çıxış möhürlərinizin surətləri
- Şəxsiyyət vəsiqənizin surəti
- İş yerindən arayış* və əgər varsa, maaş kartından çıxarış (təhsil alan şəxslər üçün təhsil müəssisəsindən arayış*)
- Adınıza olan bank hesabından arayış* və çıxarış (Məbləğ barədə aşağıda detallı məlumat qeyd olunub)
- Əgər varsa, adınıza olan mülklərin çıxarışlarının* və maşınınızın texpasport kopyası
- Mülki vəziyyətinizin sübutu* (Ailəlisinizsə, nikah haqqında şəhadətnamənizin, 18 yaşdan aşağı uşaqlarınız varsa, doğum haqqında şəhadətnamələrinin və ya nikahınız pozulubsa, nikahın pozulmasına dair sənədin surəti)
- 2 ədəd 3.5x4.5 ölçüdə, biometrik və ağ fonda şəkliniz
- Səyahətiniz üçün etdiyiniz aviabilet bronları
- Səyahətiniz üçün etdiyiniz otel rezervasiyaları
- Səfərinizi tam əhatə edəcək Şengen qaydalarına uyğun səyahət sığortası
- İngilis dilində doldurulmuş ərizə forması
- Görüş təyininin təsdiqi barədə sistemdən verilmiş sənədin çap versiyası
- Əgər turistik yox, işgüzar səfərlə bağlı vizaya müraciət olunursa, bu halda həmin iş, tədbir və ya görüşlə bağlı rəsmi dəvət məktubu
Üzərində “*” işarəsi ilə qeyd etdiyimiz sənədlər səfirliyə ingilis dilində təqdim olunmalıdır. Əgər siz sənədin orijinalını ingilis dilində yox, azərbaycanca əldə etmisinizsə, bu halda mütləq şəkildə bu sənədlərin hər biri notarial qaydada ingilis dilinə tərcümə və təsdiq edilərək səfirliyə təqdim olunmalıdır.
Qeyd edək ki, təcrübəmizdə görünmüşdür ki, İspaniya vizası üçün müraciət edilən Fransa səfirliyi ilk viza müraciətini edən şəxslərdən əksər hallarda iş yerindən arayışdan əlavə e.gov.az hökumət portalından çıxarış da tələb edib. Sənədləriniz qəbul olunduqdan sonra hər bir halda viza prosedurunuz əsnasında səfirlikdən sizə zəng gələ və bu zəngdə sizdən yeni sənədləri təqdim etməyiniz tələb oluna bilər. Nadir hallarda da olsa, Fransa səfirlyinin viza proseduru əsnasında müraciətçilərdən bron göstərdikləri otellərin alınmasını və bunu təsdiqləyən sənədlərin səfirliyə təqdim olunmasını tələb etdiyi hallar yaşanmışdır.
Bank hesabınızdakı məbləğ sizin göstərdiyiniz səyahət tarixlərinizdən, yəni Şengendə qalacağınız müddətdən, bron elədiyiniz uçuş biletləri və otellərin qiymətindən və s. asılı olaraq dəyişir. Ümumilikdə məsləhətdir ki, bir həftəlik səyahət üçün bank hesabınızda minimum 3.000-5.000 AZN (eyni qaydada avro və ya ABŞ dolları ekvivalenti keçərlidir) aralığında məbləğ göstərəsiniz. Bu məbləğ sizin səyahət planınızı tam əhatə etməlidir. Məbləği hesablayarkən bilet və otel bronlarınızın qiyməti ilə Şengen ərazisində qalacağınızı göstərdiyiniz hər gün üçün ortalama 70-80 avro gündəlik xərci cəmləyə və aldığınız rəqəmdən biraz daha yüksəyini nəzərdə tuta bilərsiniz.
Siz əgər, sahibkar kimi fəaliyyət göstərirsinizsə, iş yerindən arayışı əvəz edəcək sənədləri (VÖEN-in surəti, Vergilər Nazirliyindən dövriyyəniz haqqında verilmiş arayış, şirkətinizin reyestrdən çıxarışı) səfirliyə təqdim edə bilərsiniz. Əgər siz işləmirsinizsə, təhsil alırsınızsa və ya hər bir halda səfərinizin xərclərini qarşılamaq üçün başqa bir şəxsi sponsor göstərirsinizsə, bu halda həmin şəxsin şəxsiyyət vəsiqəsinin surəti, iş yerindən arayış (əgər sahibkardırsa, yuxarıda sadalanan sənədlər), bank hesabından arayış və çıxarış (bu bank hesabı həm sizin adınıza, həm də sponsorun adına ola bilər), əgər ailəvi bağınız varsa, bunu təsdiq edən sənədi (məsələn, valideyninizdirsə, özünüzün doğum haqqında şəhadətnaməniz, qardaş və ya bacınızdırsa, ikinizin də doğum haqqında şəhadətnamələriniz və s.) və sponsorluq haqqında kağız səfirliyə təqdim olunmalıdır. Əgər müraciət edən şəxs 18 yaşdan aşağıdırsa, bu halda tək səyahət etdiyi halda hər iki valideynindən və ya valideynlərindən biri ilə səyahət etdiyi halda isə digər valideynindən ölkədən çıxmasına dair icazə sənədin surətini də viza müraciəti zamanı təqdim etmək lazımdır.
Qeyd edək ki, VÖEN, Vergilər Nazirliyindən dövriyyə haqqında arayış, şirkətinizin reyestrdən çıxarışı və ya sponsorluq kağızı, icazə kağızı kimi sənədləri təqdim etdiyiniz halda da bu sənədlərin hər birini notarial qaydada ingilis dilinə tərcümə və təsdiq etdirməlisiniz.
Nomad vizası ilə yaşamaq və işləmək üçün Avropanın ən çox seçilən ölkəsi
Viza Proseduru
İspaniya Şengen vizası üçün müraciət Fransa Səfirliyinin Capago adlı viza müraciət mərkəzində olunur. İspaniyanın ölkəmizdə konsulluğu fəaliyət göstərməməsi səbəbilə viza haqda qərar Fransa səfirliyinin konsulluq şöbəsində konsul tərəfindən verilir.
Sənədləri təqdim etmək üçün viza görüşü onlayn şəkildə əldə edilir. Sənədləri təqdim etmək üçün əvvəlcədən görüş təyini mütləqdir. Viza müraciəti səfər tarixindən ən tez 6 ay əvvəl edilə bilər. Barmaq izindən azad olan müraciətçilər istisna olmaqla, bütün müraciətçilərin sənədləri təqdim edərkən şəxsi iştirakı mütləqdir.
Barmaq izindən azad olan şəxslər aşağıdakı qruplara bölünür:
- Son 3 ildə Şengen vizası alan və sistemdə barmaq izi olan şəxslər (Çexiya vizası istisna olmaqla)
- 12 yaşdan aşağı uşaqlar
- Barmaq izi verilməsi fiziki cəhətdən mümkün olmayan şəxslər
- Diplomatik və ya xüsusi pasport sahibi olan və İspaniyada diplomatik və ya konsulluq vəzifəsinə akreditə olunmuş şəxslər
- İspaniyada mərkəzi və ya nümayəndəliyi olan beynəlxalq bir təşkilatda səlahiyyət alacaq diplomatik və ya konsulluq personalı və onların ailə üzvləri (həyat yoldaşı və qayğıya ehtiyacı olan uşaqları)
Şengen viza proseduru müraciət tarixindən etibarən 3-5 iş günü çəkə bilər.
Qeyd edək ki, təcrübəmiz göstərir ki, Fransa Səfirliyi viza prosedurunun müddətini səyahətin başlama tarixinə uyğun planlaşdırır. Səyahət tarixləri daha yaxın olan müraciətçilərin viza nəticəsi də daha tez bəlli olur. Lakin, viza prosedurunun müddəti yalnız bu faktordan asılı olmur, keysin mürəkkəbliyi də burada rol oynaya bilir.
Viza rüsumu 35 avro təşkil edir. Bu məbləğ milli valyutada, yəni manatla nağd şəkildə və ya kartla istənilən valyutada ödənilə bilər. Sənədləri təhvil verərkən viza rüsumundan əlavə 26 avro viza mərkəzinin xidmət haqqı kimi ödənilir. Bu ödənişi də nəğd şəkildə yalnız manatla və ya kartla istənilən valyutada etmək mümkündür. Viza rüsumunun manat ekvivalenti səfirlik tərəfindən günün məzənnəsinə görə tənzimlənir.
İspaniya Şengen Vizası Alma Ehtimalı
Hər bir ölkənin viza müraciətində olduğu kimi İspaniyada da sizin viza alma şansınız profilinizin hansı vəziyyətdə olmasından asılıdır. İş yerinizin və vəzifənizin normal olması, aylıq gəlirinizin standart maaş aralığında və ya daha yüksək olması (təcrübədə 400-500 AZN aralığında aylıq gəliri olan şəxslərə viza alınması halı dəfələrlə yaşanıb), bank hesabınızda bütün səyahətinizi əhatə etməyə yetəcək qədər məbləğ göstərməyiniz, sizi ölkəyə bağlayan nüansların (adınıza mülkün olması, ailənizin və uşaqlarınızın olması) mövcudluğu və səyahət tarixçənizin yaxşı olması sizin İspaniya Şengen vizası alma şansınızı artıran faktorlardır. Təcrübəmizdə ilk Şengen vizasını Fransa səfirliyindən əldə etmiş şəxslərin kifayət qədər olmasına baxmayaraq, biz profili yüksək səviyyədə (yuxarıda sadalanan nüansların kifayət qədər yaxşı olduğu halda) olduğu hallar xaricində bir şəxs üçün ilk viza müraciəti zamanı Fransa səfirliyinin bir qədər riskli olduğunu qeyd edirik. Daha öncə bir və ya bir neçə Şengen vizanızın olması sizin Fransa səfirliyindən İspaniya vizası alma ehtimalınızı əhəmiyyətli dərəcədə yüksəldə bilir. Yenə də digər Qərbi Avropa və yüksək inkişaf etmiş Avropa ölkələrinə (Almaniya, İtaliya, Skandinaviya ölkələri və s.) nəzərən Fransa səfirliyi bəzi nüansların mövcudluğu halında ilk viza müraciəti üçün nisbətən daha yaxşı seçim ola bilər.
