Hər il milyonlarla turistin üz tutduğu, Aralıq dənizində yerləşən Cənubi Kipr öz coğrafiyası və təbiəti, turistik bölgələri və əyləncə həyatı ilə bütün dünyanın marağını özünə cəlb etməyi bacarmış bir ölkədir. Kipr vizasını əldə edərək siz də bu ada ölkəsinə səyahət edə bilərsiniz. Viza ilə bağlı ətraflı məlumatı isə bu məqalədən əldə edə bilərsiniz.

   Cənubi Kipr Viza Növləri

   Cənubi Kipr ölkəsinə planladığınız səyahətinizi Cənubi Kipr səyahət vizası əldə edərək reallaşdıra bilərsiniz. Bu viza növünə müraciət səbəbləri turizm, ailə və ya dostlara ziyarət, işgüzar səfər, tibbi müayinə və ya müalicə, qısamüddətli təhsil, mübadilə proqramları və buna bənzər bir çox daimi olmayan nüanslar ola bilər. Əgər siz Kiprdə müddəti 90 gündən çox olan uzunmüddətli təhsil (bakalavr, magistr, doktorantura və s. kimi) almaq və ya burada yerləşən bir qurumda daimi işləmək istəyirsinizsə,  həmin təhsil və iş qurumlarından rəsmi dəvət və ya qəbul məktublarınız olduğu təqdirdə Kipr milli vizasına da müraciət edə bilərsiniz. 

   Cənubi Kipr Turizm Vizası

   Cənubi Kipr vizasının təkgirişli və çoxgirişli növləri mövcuddur. Eyni zamanda siz yalnız ilk səfərinizi əhatə edəcək qısamüddətli vizaya və ya çoxgirişli və uzunmüddətli viza növlərinə də müraciət edə bilərsiniz. Bu, sizin səfərinizin məqsədindən və səfər intervalınızdan asılı olaraq dəyişir.

   Qeyd edək ki, Cənubi Kipr vizası əksər hallarda müraciətçinin viza müraciəti əsnasında ərizə formasında və digər sənədlərində göstərdiyi səyahət müddətinə tam uyğun şəkildə verilir. 

   Cənubi Kipr Vizası Müraciəti üçün Sənədlər Toplusu

   Cənubi Kipr vizasına müraciət edərkən siz aşağıdakı sənədləri təqdim etməlisiniz:

1. Xarici pasportunuzun orijinalı və birinci səhifəsinin surəti
2. Əgər varsa, əvvəlki vizalarınızın və giriş-çıxış möhürlərinizin surətləri
3. Şəxsiyyət vəsiqənizin surəti
4. İş yerindən arayış* və əgər varsa, maaş kartından çıxarış (təhsil alan şəxslər üçün təhsil müəssisəsindən arayış*)
5. Adınıza olan bank hesabından arayış* və çıxarış. (Məbləğ barədə aşağıda detallı məlumat qeyd olunub)
6. Əgər varsa, adınıza olan mülklərin çıxarışlarının* və maşınınızın texpasport kopyası
7. Əgər ailə üzvünüzlə birlikdə müraciət edirsinizsə, mülki vəziyyətinizin sübutu* (Yoldaşınızla edirsinizsə, nikah haqqında şəhadətnamənizin, Övladınızla edirsinizsə, doğum haqqında şəhadətnaməsinin surəti)
8. 2 ədəd 3.5x4.5 ölçüdə, ağ fonda şəkliniz
9. Səyahətiniz üçün etdiyiniz aviabilet bronları
10. Səyahətiniz üçün etdiyiniz otel rezervasiyaları
11. Səfərinizi tam əhatə edəcək və minimum 30.000 EUR dəyəri əhatə edən səyahət sığortası
12. İngilis dilində doldurulmuş ərizə forması
13. Əgər turistik yox, işgüzar səfərlə bağlı vizaya müraciət olunursa, bu halda həmin iş, tədbir və ya görüşlə bağlı rəsmi dəvət məktubu

   Üzərində “*” işarəsi ilə qeyd etdiyimiz sənədlər səfirliyə ingilis dilində təqdim olunmalıdır. Əgər siz sənədin orijinalını ingilis dilində yox, azərbaycanca əldə etmisinizsə, bu halda mütləq şəkildə bu sənədlərin hər biri notarial qaydada ingilis dilinə tərcümə və təsdiq edilərək səfirliyə təqdim olunmalıdır.

   Bank hesabınızdakı məbləğ sizin göstərdiyiniz səyahət tarixlərinizdən, yəni Cənubi Kiprdə qalacağınız müddətdən, bron elədiyiniz uçuş biletləri və otellərin qiymətindən və s. asılı olaraq dəyişir. Ümumilikdə məsləhətdir ki, bir həftəlik səyahət üçün bank hesabınızda minimum 2.000-3.000 AZN (eyni qaydada avro və ya ABŞ dolları ekvivalenti keçərlidir) aralığında məbləğ göstərəsiniz. Bu məbləğ sizin səyahət planınızı tam əhatə etməlidir. Məbləği hesablayarkən bilet və otel bronlarınızın qiyməti ilə ölkə ərazisində qalacağınızı göstərdiyiniz hər gün üçün ortalama 60-70 avro gündəlik xərci cəmləyə və aldığınız rəqəmdən biraz daha yüksəyini nəzərdə tuta bilərsiniz.

   Siz əgər, sahibkar kimi fəaliyyət göstərirsinizsə, iş yerindən arayışı əvəz edəcək sənədləri (VÖEN-in surəti, Vergilər Nazirliyindən dövriyyəniz haqqında verilmiş arayış, şirkətinizin reyestrdən çıxarışı) səfirliyə təqdim edə bilərsiniz. Əgər siz işləmirsinizsə, təhsil alırsınıza və ya hər bir halda səfərinizin xərclərini qarşılamaq üçün başqa bir şəxsi sponsor göstərirsinizsə, bu halda həmin şəxsin şəxsiyyət vəsiqəsinin surəti, iş yerindən arayış (əgər sahibkardırsa, yuxarıda sadalanan sənədlər), bank hesabından arayış və çıxarış (bu bank hesabı həm sizin adınıza, həm də sponsorun adına ola bilər), əgər ailəvi bağınız varsa, bunu təsdiq edən sənədi (məsələn, valideyninizdirsə, özünüzün doğum haqqında şəhadətnaməniz, qardaş və ya bacınızdırsa, ikinizin də doğum haqqında şəhadətnamələriniz və s.) və sponsorluq haqqında kağız səfirliyə təqdim olunmalıdır. Əgər müraciət edən şəxs 18 yaşdan aşağıdırsa, bu halda tək səyahət etdiyi halda hər iki valideynindən və ya valideynlərindən biri ilə səyahət etdiyi halda isə digər valideynindən ölkədən çıxmasına dair icazə sənədin surətini də viza müraciəti zamanı təqdim etmək lazımdır.

   Qeyd edək ki, VÖEN, Vergilər Nazirliyindən dövriyyə haqqında arayış, şirkətinizin reyestrdən çıxarışı və ya sponsorluq kağızı, icazə kağızı kimi sənədləri təqdim etdiyiniz halda da bu sənədlərin hər birini notarial qaydada ingilis dilinə tərcümə və təsdiq etdirməlisiniz.

   Viza Proseduru

   Azərbaycan vətəndaşları viza üçün müraciəti Kiprin Moskvadakı Səfirliyinə edirlər.  

   Viza müraciəti üçün sənədləri təqdim etməyin 3 yolu vardır: 

1. Müraciətçi şəxsən viza müraciətini edir və sənədləri təqdim edir; 
2. Müraciətçi sənədləri kuryer vasitəsilə göndərir; 

   Kipr Səfirliyi ödənişi bank transferi və ya onlayn şəkildə deyil, yalnız nəğd şəkildə qəbul edir. Kuryer vasitəsilə pul daşınması  qadağan olunduğuna görə isə rüsumu nəğd şəkildə sənədlərlə birlikdə göndərmək mümkün deyil. Belə olan halda, viza rüsumunu Moskvada yaşayan hər hansı bir şəxsə bank transferi ilə göndərmək və həmin şəxsin pulu bankdan çıxarıb nəğd şəkildə səfirliyə təqdim etməsi lazımdır.  

3. Müraciətçi ilə birlikdə Kiprə səyahət edən və viza müraciəti edən şəxs öz sənədləri ilə birlikdə müraciətçinin sənədlərini də təqdim edir. 

   Məsələn, 3 nəfər birlikdə Kiprə səyahət edirlərsə və vizaya müraciət etmələri tələb olunursa, bu üç nəfərdən biri digərlərinin sənədlərini təqdim edə bilər, lakin onlarla viza müraciəti etməyən hər hansı 4-cü bir adam onların sənədlərini təqdim edə bilməz. 

   Qeyd edək ki, Kipr vizası üçün müraciət etmiş şəxslərin viza nəticəsi, adətən, 1-3 iş günü ərzində bəlli olur. Yalnız bu müddətə sənədlərin kuryerlə daşınması kimi detallar aid deyil.

   Viza rüsumu isə bir nəfər üçün 20 avro olaraq nəzərdə tutulub.

   Cənubi Kipr Vizası Alma Ehtimalı

   Bütün ölkələrin səfirliyinə viza müraciəti edərkən olduğu kimi Cənubi Kiprdə də sizin viza alma şansınız profilinizin hansı vəziyyətdə olmasından asılıdır. İş yerinizin və vəzifənizin normal olması, aylıq gəlirinizin standart maaş aralığında olması (təcrübədə 300-500 AZN aralığında aylıq gəliri olan şəxslərə viza alınması halı dəfələrlə yaşanıb), bank hesabınızda bütün səyahətinizi əhatə etməyə yetəcək qədər məbləğ göstərməyiniz, sizi ölkəyə bağlayan nüansların (adınıza mülkün olması, ailənizin və uşaqlarınızın olması) mövcudluğu və səyahət tarixçənizin olması sizin Cənubi Kipr vizası alma şansınızı artıran faktorlardır. Daha öncə səyahət tarixçəsi olmamış, yəni Şengen və ya digər viza sahibi olmayan şəxslər üçün Cənubi Kipr səfirliyi riskli səfirlik hesab olunmur. Təcrübəmizdə ilk vizalarını məhz bu səfirlikdən almış çox sayda müraciətçi olmuşdur. Əlbəttə, bunun üçün sizin digər bütün sənədləriniz qaydasında olmalıdır. Həmçinin, hər bir halda sizin daha öncə vizalarınızın olması Cənubi Kipr vizası alma ehtimalınızı yüksəldən faktorlardan biridir.

   Cənubi Kiprə Viza Dəstəyi

   Biz Vizam.az şirkəti olaraq sizə Cənubi Kipr vizası müraciətiniz zamanı yardımçı ola bilərik.          Əgər siz bizim viza dəstəyi xidmətimizdən istifadə etsəniz, bizim xidmətə səfirlikdə sizin adınıza görüş təyin olunması, ərizə formanızın doldurulması, sənədlərinizin peşəkar qaydada hazırlanması, səyahətinizi əhatə edəcək uçuş biletlərinizin rezervasiyası, otellərin bronu və ya istəyinizə uyğun şəkildə alınması, viza üçün səyahət tur planınızın qurulması, səfərinizi əhatə edəcək səyahət sığortasının edilməsi, konsultasiya, viza prosedurunuzun izlənilməsi daxil olacaq. Bunlardan əlavə, biz sizə sənədlərinizin Moskvadakı səfirliyə kuryerlə çatdırılması və pasportunuzun geri qaytarılması, həmçinin viza ödənişinin edilməsi ilə bağlı da yardımçı ola bilərik. Bu əlavə xidmətin dəyəri 215 AZN təşkil edir. Qeyd edək ki, səyahət sığortasının rüsumu bizim xidmət haqqıdan əlavə hesablanacaq. Sığortanın rüsumu  adətən, 1 həftə üçün 16-18 AZN aralığında olur. Bu sığortanı siz özünüz də etdirə bilərsiniz. Həmçinin biz sizə sənədlərinizin notarial qaydada ingilis dilinə tərcümə və təsdiq olunması ilə də bağlı yardımçı ola bilərik. Hər bir sənəd üçün əlavə rüsum 16 AZN təşkil edəcək. Ümumi olaraq isə bizim şirkətimizdə Cənubi Kipr vizasına dəstək xidmət haqqısı bir nəfər üçün 125 AZN təşkil edir.

  Sifarişinizi yerləşdirmək üçün buraya klikləyə, əlavə məlumat almaq üçün 050/55-3000135 nömrələri ilə əlaqə saxlaya bilərsiniz.

  Xoş səyahətlər!