2025-ci ildə Macarıstan Şengen Vizası Necə Müraicət Edim?

Macarıstan Avropanın mərkəzində yerləşən, zəngin tarixi, gözəl təbiəti və əlverişli turizm imkanları ilə seçilən bir ölkədir. Budapeştin termal hamamlarından tutmuş Balaton gölünün sahillərinə qədər hər kəs üçün maraqlı məkanlar təqdim edən Macarıstan, 2025-ci ildə səyahət planlayan azərbaycanlı turistlərin də diqqət mərkəzindədir. Avropa Birliyinə üzv olan bu ölkəyə səfər etmək üçün isə Şengen vizası tələb olunur.

Bu yazıda 2025-ci ildə Macarıstan Şengen vizasına necə müraciət edəcəyinizi, lazım olan sənədləri, onlayn qeydiyyat prosesini, görüş təyin etmə qaydalarını və nəzərə alınmalı önəmli detalları addım-addım izah edəcəyik. Əgər siz də Macarıstanı ziyarət etməyi planlayırsınızsa, bu blog sizin üçün praktiki bələdçi olacaq.

Avropa Turuna Haradan Başlamaq Daha Uyğundur? Cavab: Budapeşt!

Əgər 2025-ci ildə Avropanı kəşf etmək planınız varsa, səyahətə Macarıstanın paytaxtı Budapeştdən başlamağınız həm büdcə baxımından, həm də logistik cəhətdən çox daha sərfəli olacaq. Budapeşt, digər Şengen ölkələri ilə müqayisədə daha münasib aviabiletlərlə səfər edilə bilən Avropa şəhərlərindən biridir. Xüsusilə Azərbaycandan Budapeştə uçuşlar ilin bir çox vaxtı daha ucuz qiymətlərlə təklif olunur.

Bununla yanaşı, Budapeştin Avropanın mərkəzində yerləşməsi onu digər ölkələrə keçid üçün ideal bir başlanğıc nöqtəsinə çevirir. Şəhərdən qatar və avtobusla Almaniya, Avstriya, Çexiya, Slovakiya, İtaliya və Polşa kimi ölkələrə asanlıqla və çox ucuz qiymətlərlə səyahət etmək mümkündür.

Məşhur və ucuz səyahət yolları:

FlixBus: Budapeştdən Vyana, Bratislava, Praqa, Münhen və digər şəhərlərə gündəlik avtobus marşrutları mövcuddur. Qiymətlər 10-30 avro arasında dəyişə bilər.

RegioJet və ÖBB Qatar Xətləri: Komfortlu və sürətli qatarlarla 2-4 saat ərzində qonşu ölkələrə keçid mümkündür.

WizzAir və Ryanair kimi aşağı büdcəli aviaşirkətlər: Budapeşt hava limanından Avropanın 50-dən çox şəhərinə ucuz uçuşlar təşkil olunur. Bəzən 10-20 avroya bilet tapmaq olur.

Beləliklə, həm Şengen vizasına ilk giriş üçün, həm də Avropada büdcəyə uyğun səyahət planı qurmaq üçün Budapeşt əla seçimdir. Səyahətinizi ağıllı planlayın, həm xərcə qənaət edin, həm də daha çox yer gəzə bilin!

Macarıstan Şengen Vizası

Digər Şengen ölkələrinə oxşar olaraq Macarıstan Şengen vizasının da təkgirişli və çoxgirişli növləri mövcuddur. Macarıstan Şengen vizasını əldə etdikdən sonra istənilən Şengen ölkəsinə giriş edə bilmək mümkündür. Ancaq hər bir halda biz məsləhət görürük ki, Şengen ərazisinə ilk girişinizi viza aldığınız ölkədən, yəni Macarıstandan edəsiniz. Əks halda siz viza müraciətiniz zamanı qeyd etmədiyiniz təqdirdə Macarıstan vizası ilə Şengen ərazisinə başqa bir ölkədən (xüsusilə də Qərbi Avropa ölkələrindən) giriş etməyə çalışsanız, nadir hallarda da olsa, bu sizin üçün problemə çevrilə, həmin ölkənin sərhəd xidməti sizi geri qaytara və ölkəyə girişinizə icazə verməyə bilər. Bu təcrübə bəzi hallarda yaşanıb və bu səbəblə də biz sizə bu riskdən qaçınmağı tövsiyə edirik.

Əgər siz Macarıstan Şengen vizasına müraciət edirsinizsə, səyahətiniz boyu gün sayı, yəni müddət olaraq ən çox bu ölkədə qalacağınızı göstərməlisiniz. Əksər viza müraciətçiləri və səyahətçilər Macarıstandan əlavə olaraq öz tur planlarına Çexiya, Avstriya, Polşa və digər Avropa ölkələrini də əlavə edirlər. Bu kimi hallar sizin viza müraciətinizdə heç bir problem yaratmayacaq nüanslardır. Sadəcə ümumi səyahətiniz müddətində ən çox qalacağınız ölkəni Macarıstan göstərməyiniz viza üçün məhz Macarıstan səfirliyinə müraciət edə bilməyiniz üçün yetərli olacaqdır.

Macarıstan Şengen Vizası Müraciəti üçün Sənədlər Toplusu

Macarıstan Şengen vizasına müraciət edərkən siz aşağıdakı sənədləri təqdim etməlisiniz:

1. Xarici pasportunuzun orijinalı və birinci səhifəsinin surəti
2. Əgər varsa, əvvəlki vizalarınızın və giriş-çıxış möhürlərinizin surətləri
3. Şəxsiyyət vəsiqənizin surəti
4. İş yerindən arayış* və əgər varsa, maaş kartından çıxarış (təhsil alan şəxslər üçün təhsil müəssisəsindən arayış*)
5. Elektron hökumət portalından işlə bağlı arayış
6. Adınıza olan bank hesabından arayış* və çıxarış. (Məbləğ barədə aşağıda detallı məlumat qeyd olunub)
7. Əgər varsa, adınıza olan mülklərin çıxarışlarının* və maşınınızın texpasport kopyası
8. Mülki vəziyyətinizin sübutu* (Ailəlisinizsə, nikah haqqında şəhadətnamənizin, 18 yaşdan aşağı uşaqlarınız varsa, doğum haqqında şəhadətnamələrinin və ya nikahınız pozulubsa, nikahın pozulmasına dair sənədin surəti)
9. 2 ədəd 3.5x4.5 ölçüdə, biometrik və ağ fonda şəkliniz
10. Səyahətiniz üçün etdiyiniz aviabilet bronları
11. Səyahətiniz üçün etdiyiniz otel rezervasiyaları
12. Səfərinizi tam əhatə edəcək Şengen qaydalarına uyğun səyahət sığortası
13. İngilis dilində doldurulmuş ərizə forması
14. Görüş təyininin təsdiqi barədə sistemdən verilmiş sənədin çap versiyası
15. Əgər turistik yox, işgüzar səfərlə bağlı vizaya müraciət olunursa, bu halda həmin iş, tədbir və ya görüşlə bağlı rəsmi dəvət məktubu

Üzərində “*” işarəsi ilə qeyd etdiyimiz sənədlər səfirliyə ingilis dilində təqdim olunmalıdır. Əgər siz sənədin orijinalını ingilis dilində yox, azərbaycanca əldə etmisinizsə, bu halda mütləq şəkildə bu sənədlərin hər biri notarial qaydada ingilis dilinə tərcümə və təsdiq edilərək səfirliyə təqdim olunmalıdır.

Bank hesabınızdakı məbləğ sizin göstərdiyiniz səyahət tarixlərinizdən, yəni Şengendə qalacağınız müddətdən, bron elədiyiniz uçuş biletləri və otellərin qiymətindən və s. asılı olaraq dəyişir. Ümumilikdə məsləhətdir ki, bir həftəlik səyahət üçün bank hesabınızda minimum 1.500-3.000 AZN (eyni qaydada avro və ya ABŞ dolları ekvivalenti keçərlidir) aralığında məbləğ göstərəsiniz. Bu məbləğ sizin səyahət planınızı tam əhatə etməlidir. Məbləği hesablayarkən bilet və otel bronlarınızın qiyməti ilə Şengen ərazisində qalacağınızı göstərdiyiniz hər gün üçün ortalama 60-70 avro gündəlik xərci cəmləyə və aldığınız rəqəmdən biraz daha yüksəyini nəzərdə tuta bilərsiniz.

Siz əgər, sahibkar kimi fəaliyyət göstərirsinizsə, iş yerindən arayışı əvəz edəcək sənədləri (VÖEN-in surəti, Vergilər Nazirliyindən dövriyyəniz haqqında verilmiş arayış, şirkətinizin reyestrdən çıxarışı) səfirliyə təqdim edə bilərsiniz.

Əgər siz işləmirsinizsə, təhsil alırsınızsa və ya hər bir halda səfərinizin xərclərini qarşılamaq üçün başqa bir şəxsi sponsor göstərirsinizsə, bu halda həmin şəxsin şəxsiyyət vəsiqəsinin surəti, iş yerindən arayış (əgər sahibkardırsa, yuxarıda sadalanan sənədlər), bank hesabından arayış və çıxarış (bu bank hesabı həm sizin adınıza, həm də sponsorun adına ola bilər), əgər ailəvi bağınız varsa, bunu təsdiq edən sənədi (məsələn, valideyninizdirsə, özünüzün doğum haqqında şəhadətnaməniz, qardaş və ya bacınızdırsa, ikinizin də doğum haqqında şəhadətnamələriniz və s.) və sponsorluq haqqında kağız səfirliyə təqdim olunmalıdır. Əgər müraciət edən şəxs 18 yaşdan aşağıdırsa, bu halda tək səyahət etdiyi halda hər iki valideynindən və ya valideynlərindən biri ilə səyahət etdiyi halda isə digər valideynindən ölkədən çıxmasına dair icazə sənədin surətini də viza müraciəti zamanı təqdim etmək lazımdır.

Qeyd edək ki, VÖEN, Vergilər Nazirliyindən dövriyyə haqqında arayış, şirkətinizin reyestrdən çıxarışı və ya sponsorluq kağızı, icazə kağızı kimi sənədləri təqdim etdiyiniz halda da bu sənədlərin hər birini notarial qaydada ingilis dilinə tərcümə və təsdiq etdirməlisiniz.

Viza Proseduru

Macarıstan Şengen vizası üçün müraciət Macarıstan Səfirliyinin konsulluq şöbəsində və ya BLS International adlı viza müraciət mərkəzində olunur. Viza haqda qərar Bakıdakı Macarıstan səfirliyinin konsulluq şöbəsində konsul tərəfindən verilir. Macarıstan görüşləri BLS saytından təyin edib, sənədləri visametricə təhvil vermək lazımdır. Viza mərkəzi haqqında lazımlı sənədlər, rüsumlar 2025-ci ildəki ən son dəyişikliklər üçün buraya klik edərək keçid edə bilərsiniz.

Viza müraciəti səfər tarixindən ən tez 3 ay əvvəl edilə bilər və müraciət zamanı şəxsi iştirakı mütləqdir. 12 yaşına çatmamış uşaqların Macarıstan Səfirliyinin Konsulluq Şöbəsinə gətirilməsinə ehtiyac yoxdur, çünki onlardan barmaq izləri götürülmür (lakin onlar üçün ayrı vaxt götürülməlidir, çünki ərizəyə baxılması vaxt tələb edir).

Şengen viza proseduru müraciət tarixindən etibarən, adətən, 5-15 kalendar günü (bayramla əlaqəli rəsmi qeyri-iş günləri istisna olmaqla) davam edir.

Cavab müddəti: Ərizəçi planlaşdırılan səyahətdən 3 aydan tez və 15 iş gününden gec olmayaraq müraciət edə bilər. Viza müraciətlərinə baxılması 7-15 iş günü müddətində davam edir. Lakin konsul əlavə sənədlər tələb edərsə bu müddət uzana bilər. Viza müraciətlərinə baxılması müddəti bəzi ölkələrin vətəndaşları üçün daha uzun çəkə bilər.

Viza müraciəti birbaşa konsulluğa müraciət edilərkən, yalnız 35 avro viza rüsumu ödənilir. Müraciətçi konsulluğa sənədlərini təqdim etdikdən sonra ona viza rüsumunun ödənişi üçün müvafiq çek verilir. Bu çek əsasənda müraciətçi ödənişi Azərbaycan Beynəlxalq Bankının Əsas binasında (Nizami küç. 67) həyata keçirməli və ödənişin həyata keçirildiyinə dair qəbzi konsulluğa həmin gün təqdim etməlidir.

Müraciətçi viza mərkəzinə müraciət etdiyi halda isə, 35 avrodan əlavə 29 avro viza mərkəzinin xidmət haqqı üçün də ödəniş edilməlidir və bu ödəniş sənədləri təqdim edərkən yerindəcə edilir.

Macarıstan Şengen Vizası Alma Ehtimalı

Bütün ölkələrin səfirliyinə viza müraciəti edərkən olduğu kimi Macarıstanda da sizin viza alma şansınız profilinizin hansı vəziyyətdə olmasından asılıdır. İş yerinizin və vəzifənizin normal olması, aylıq gəlirinizin standart maaş aralığında olması (təcrübədə 300-500 AZN aralığında aylıq gəliri olan şəxslərə viza alınması halı dəfələrlə yaşanıb), bank hesabınızda bütün səyahətinizi əhatə etməyə yetəcək qədər məbləğ göstərməyiniz, sizi ölkəyə bağlayan nüansların (adınıza mülkün olması, ailənizin və uşaqlarınızın olması) mövcudluğu və səyahət tarixçənizin olması sizin Macarıstan Şengen vizası alma şansınızı artıran faktorlardır. Daha öncə Şengen vizası olmayan şəxslər üçün Macarıstan səfirliyi digər səfirliklərə nisbətən, daha rahat şəkildə müraciət ediləcək, daha az riskli səfirlikdir. Macarıstan səfirliyi təcrübəmizdə daha öncə səyahət tarixçəsi olmayan şəxslərin ən çox Şengen vizası aldığı səfirliklərdən biridir. Ancaq hər bir halda daha öncə Şengen vizalarınızın olması sizin Macarıstan səfirliyindən viza alma ehtimalınızı yüksəldən faktordur.

Macarıstana Viza Dəstəyi

Biz Vizam.az şirkəti olaraq sizə Macarıstan Şengen vizası müraciətiniz zamanı yardımçı ola bilərik. Əgər siz bizim viza dəstəyi xidmətimizdən istifadə etsəniz, bizim xidmətə səfirlikdə sizin adınıza görüş təyin olunması, ərizə formanızın doldurulması, sənədlərinizin peşəkar qaydada hazırlanması, səyahətinizi əhatə edəcək uçuş biletlərinizin rezervasiyası, otellərin bronu və ya istəyinizə uyğun şəkildə alınması, viza üçün səyahət tur planınızın qurulması, səfərinizi əhatə edəcək səyahət sığortasının edilməsi, konsultasiya, viza prosedurunuzun izlənilməsi daxil olacaq. Qeyd edək ki, səyahət sığortasının rüsumu bizim xidmət haqqıdan əlavə hesablanacaq. Sığortanın rüsumu adətən, 1 həftə üçün 16-18 AZN aralığında olur. Bu sığortanı siz özünüz də etdirə bilərsiniz. Həmçinin biz sizə sənədlərinizin notarial qaydada ingilis dilinə tərcümə və təsdiq olunması ilə də bağlı yardımçı ola bilərik. Hər bir sənəd üçün əlavə rüsum 16 AZN təşkil edəcək. Ümumi olaraq isə bizim şirkətimizdə Macarıstan Şengen vizasına dəstək xidmət haqqısı bir nəfər üçün 79 AZN təşkil edir.

Sifarişinizi yerləşdirmək üçün buraya klikləyə bilərsiniz. Əlavə məlumat üçün 010/50/55-3000135 nömrələri ilə əlaqə saxlaya bilərsiniz.

Xoş səyahətlər!