Deyirsiz həm ucuz olsun, həm dəniz olsun, həm yeni yerlər görüm, həm yeməkləri maraqlı olsun, amma çox da xərcim çıxmasın? Bax, o dediyinizin adı Tayland. Bir dəfə gedəndən sonra “niyə bu vaxta qədər getməmişdim?” deyəcəksiz.
Tayland istirahət anlayışını bir az dəyişdirir. Yəni təkcə günəşin altında uzanmaqdan getmir söhbət. Burda həm şəhərin səsi var, həm dənizin sakitliyi. Əgər səhər banqloda oyanıb, günortanı dəniz kənarında keçirmək, axşam isə küçə yeməkləri ilə dolu bir bazarda gəzmək idealdı deyirsinizsə tam sənlikdir. Üstəlik, cib dostudur. Avropa səfərində ödəyəcəyiniz məbləğlə Taylandda kral kimi yaşaya bilərsiniz.
Gəzməli yerləri də müxtəlifdir. Paytaxt Bangkok səs-küylü, hər yerdə hərəkət, hər guşədə bir sürpriz. Chiang Mai – sakit, təbiətə yaxın, bir az da ruhani. Fillərlə vaxt keçirmək istəyirsinizsə, orda imkan var. Phuket, Krabi, Koh Samui kimi adalar isə tam istirahət üçündür ağ qumlar, şəffaf dəniz, palmalar.
Yeməklərə gəlincə, əgər acı və ədviyyatlı yeməkləri sevirsinizsə yaşadınız. Tay mətbəxi dad baxımından çox zəngindir. Küçələrdə bişirilən yeməklərin qoxusu adamı bir addım yerində saxlayır. “Pad Thai” yemədən qayıtmaq günahdır. “Mango sticky rice” isə desertlər içində ulduzdur.
İnsanlar çox gülərüz və köməksevərdi. Çox vaxt turistlərlə ünsiyyətə açıqdırlar, bir şeyi tapmaqda çətinlik çəkəndə sənə yol göstərməyə çalışırlar – hətta ingiliscələri zəif olsa belə.
Qısası, həm macəra istəyirsinizsə, həm də rahatlıq Taylandda hər ikisi var. Əgər nə vaxtsa “istirahətə getmək istəyirəm, amma nəyə görə ora?” dilemmasında qalmısinizsa cavab budur: Tayland.
Taylanda Necə Gedə Bilərəm?
Əslində bu proses düşündüyünüz qədər çətin deyil. Sadəcə bəzi əsas addımları bilsəniz, rahatlıqla tropik tətilinizə başlaya bilərsiniz. Gəlin, sizə bunu sadə və aydın şəkildə izah edək.
Tayland Vizası
İlk olaraq viza məsələsinə baxaq. Azərbaycan vətəndaşları Taylanda turistik məqsədlə səfər etmək üçün artıq elektron viza (e-Visa) almalıdır. Yəni vizanızı getməzdən əvvəl onlayn şəkildə əldə etməlisiniz.
Tayland e-Viza üçün nə etməlisiniz?
- Rəsmi viza portalına daxil olun: https://thaievisa.go.th
- Onlayn ərizə formasını doldurun.
- Tələb olunan sənədləri sistemə yükləyin:
- Ödənişi onlayn həyata keçirin.
- Vizanın təsdiqi üçün təxminən 1 ay çəkir.
- E-viza e-poçt ünvanınıza göndərilir və onu çap edərək səyahətə çıxırsınız.
Elektron Viza üçün Tələb Olunan Sənədlər
- Şəkil 4x6
- Pasport (6 aylıq etibarlılıq müddəti)
- Şəxsiyyət vəsiqəsinin surəti
- Xarici pasport
- Alınmış aviabilet
- Bank çıxarışı
Mövsüm və Hava
Taylandda hava ilboyu isti olsa da, ölkədə üç əsas mövsüm var: quru, isti, və yağışlı mövsüm. Səfərinizi hansı tarixə planladığınız, orada necə bir tətil keçirdiyinizə birbaşa təsir edir.
Quru Mövsüm (Noyabr – Fevral)
Bu dövr Taylanda səfər üçün ən ideal vaxt sayılır. Hava isti, amma dözülə biləcək qədər rütubətsiz olur. Səhərlər sərin, günorta saatlarında isə rahatlıqla dənizə girə, şəhəri gəzə bilərsiniz. Ən çox turist də bu aylarda gəlir, çünki hava həm sahil zonalarında, həm də şəhərlərdə çox əlverişlidir. Əgər məqsədiniz rahatca günəşlənmək, adaları gəzmək və çox yağışa düşməməkdirsə, noyabr–fevral aralığını seçməyinizi tövsiyə edirik.
İsti Mövsüm (Mart – May)
Bu dövr Taylandda ən isti aylardır. Xüsusilə aprel ayında temperatur 35-40°C-yə qədər qalxa bilər. Əgər istiyə qarşı dözümlüsünüzsə və günəşli havanı sevirsinizsə, bu dövrdə də istirahət edə bilərsiniz. Bu aylar ərzində daha az turist olur, otel və uçuş qiymətləri də daha sərfəlidir. Amma sərinləmək üçün otelinizin hovuzu və ya yaxınlığında dəniz olması vacibdir.
Yağışlı Mövsüm (İyun – Oktyabr)
Bu dövrdə mozon yağışları başlayır. Amma bu o demək deyil ki, Taylanda getmək olmaz. Əksinə, bəzən günün yalnız 1-2 saatında yağış yağır, qalan vaxt günəş çıxır. Üstəlik, bu aylarda həm otel, həm də uçuş qiymətləri xeyli ucuzlaşır. Əgər daha sakit tətil istəyirsinizsə, insanların az olduğu, otel qiymətlərinin endirimli olduğu bu dövr yaxşı fürsət ola bilər. Sadəcə çətirinizi və bir az ehtiyat planınızı götürməyi unutmayın.
Nəticə olaraq, Taylanda nə vaxt getmək istədiyiniz sizin tətil gözləntilərinizə bağlıdır:
Komfortlu hava + aktivlik: Noyabr – Fevral
Ucuz qiymətlər + isti hava: Mart – May
Romantik yağışlar + endirimli səfər: İyun – Oktyabr
Harada qalmaq olar?
Taylandda otel seçimləri çox genişdir – 10 dollara hostel də tapa bilərsiniz, 200 dollara lüks villa da. Tayland müxtəlif büdcələrə uyğun qalmaq variantları ilə məşhurdur – burada həm lüks kurortlar, həm də daha sərfəli hostellər və qonaq evləri tapmaq mümkündür. Hər şey hansı şəhərə və necə bir tətil istədiyinizə bağlıdır.
Əgər ilk dəfə Taylanda gedirsinizsə, paytaxt Bangkok yaxşı başlanğıc nöqtəsidir. Şəhərdə müxtəlif səviyyəli otellər var və nəqliyyat sistemi rahat işlədiyindən bir çox yeri asanlıqla gəzə bilərsiniz. Sukhumvit və Silom bölgələri daha sakit və rahat otel variantları təklif edir, Khao San Road isə daha çox gənclərin və sırt çantalı səyahətçilərin üstünlük verdiyi, münasib qiymətli hostellərlə tanınır.
Əgər əsas məqsədiniz dəniz, günəş və istirahətdirsə, Phuket bölgəsi sizin üçün uyğundur. Burada həm ailəvi istirahət üçün sakit ərazilər, həm də əyləncə və gecə həyatı ilə tanınan sahələr mövcuddur. Patong sahili daha canlı, Kata və Karon isə daha sakit tətil üçün uyğundur.
Əgər daha sakit, daha az turist olan bir mühit istəyirsinizsə, Krabi bölgəsi və Ao Nang sahili sizə uyğun gələ bilər. Burada təbiət gözəllikləri ilə yanaşı, təmiz və münasib qiymətli qalmaq yerləri tapmaq asandır.
Adaları sevirsinizsə, Koh Samui, Koh Phangan və Koh Tao da nəzərə almağa dəyər. Koh Samui daha çox ailəvi tətil üçün uyğun olan, rahat və təmiz sahilləri ilə tanınır. Koh Phangan xüsusilə gənclər arasında məşhurdur və burada musiqi festivalları təşkil olunur. Koh Tao isə daha sakitdir və dalğıclıq həvəskarları üçün ideal məkandır.
Taylandda qonaqlama qiymətləri mövsümə, yerləşmə növünə və səfər bölgəsinə görə dəyişir. Qış və bayram dövrlərində qiymətlər bir qədər yüksələ bilər, buna görə əvvəlcədən rezervasiya etmək faydalı olar. Əgər daha sərfəli qalmaq istəyirsinizsə, Airbnb və ya Booking.com üzərindən fərdi evlər və ya qonaq evlərinə baxa bilərsiniz.
Qiymətlər və büdcə
Taylandda səyahət edərkən büdcə məsələsi çoxlarını maraqlandırır. Xoş xəbər odur ki, Tayland həm lüks istirahət, həm də daha sərfəli tətil axtaranlar üçün münasib ölkədir. Burada gündəlik xərcləriniz planlamanıza və seçimlərinizə görə dəyişə bilər. Gəlin ümumi bir büdcə çərçivəsində sizə nələrin gözlədiyini izah edək.
Əvvəlcə uçuş xərclərindən başlayaq. Qatar Airways, Turkish Airlines və FlyDubai kimi şirkətlərlə Bangkok, Phuket və ya Krabi kimi şəhərlərə bilet qiymətləri mövsümə görə dəyişsə də, ümumilikdə 600–900 AZN arası olur. Mövsümdən əvvəl bilet almaqla bu qiyməti daha da sərfəli etmək olar.
Qalmaq xərclərinə gəlincə, Taylandda seçim çoxdur. Əgər siz komfortlu otellərə üstünlük verirsinizsə, gecəlik 70–150 AZN arası xərclə hesablaşmaq lazımdır. Əgər büdcənizi qorumaq istəyirsinizsə, hostellər və ya orta səviyyəli otellərdə gecəlik 20–50 AZN civarında qalmaq mümkündür. Airbnb vasitəsilə də daha sərfəli və fərdi yaşayış yerləri tapmaq olur.
Yemək xərcləri Taylandda digər ölkələrlə müqayisədə kifayət qədər münasibdir. Yerli küçə yeməkləri çox dadlı və ucuzdur – bir yemək üçün 3–5 AZN kifayət edir. Restoranlarda isə bu məbləğ 10–20 AZN-ə qədər arta bilər. Əgər oteldə qalırsınızsa, səhər yeməyi çox zaman qiymətə daxil olur.
Şəhərdaxili nəqliyyat da sərfəlidir. Bangkokda metro və avtobuslarla gediş haqqı 0.5–1.5 AZN arası dəyişir. Grab kimi taksi tətbiqləri ilə də rahat hərəkət etmək olur. Əgər ada bölgələrinə gedirsinizsə, qayıq və ya sürətli katerlərlə bilet qiymətləri 10–30 AZN arasında dəyişə bilər.
Əlavə olaraq, muzeylərə, məbədlərə giriş və digər turistik fəaliyyətlər üçün də müəyyən büdcə ayırmaq gərəkdir. Ən çox ziyarət edilən yerlərdə giriş haqqı 5–15 AZN arasında olur. Snorkeling, dalğıclıq, ada turları kimi fəaliyyətlər isə 30–70 AZN arası ola bilər.
Sonda isə alış-veriş və şəxsi xərclər üçün bir miqdar pul ayırmağınız tövsiyə olunur. Taylandda yerli bazarlar və ticarət mərkəzlərində həm suvenirlər, həm də geyim və digər əşyaları münasib qiymətlərlə almaq mümkündür.
Ümumilikdə, gündəlik xərcləriniz 40–80 AZN arası ola bilər. Əgər Taylandda orta səviyyəli rahat bir tətil planlayırsınızsa, 7–10 günlük səfər üçün təxminən 800–1200 AZN arasında büdcə kifayət edəcək. Əgər daha lüks tətil istəyirsinizsə, bu məbləğ artacaq. Biz sizin üçün səyahət planınızı daha konkretləşdirməkdə və uyğun təkliflərlə kömək etməkdə maraqlıyıq.
Taylandda Nə Yemək Olar?
Tayland mətbəxi dünyanın ən məşhur və rəngarəng mətbəxlərindən biridir. Əgər siz Taylanda səyahət edirsinizsə, yerli yeməkləri dadmaq, bu ölkənin mədəniyyətini hiss etmək üçün vacib təcrübələrdən biridir. Sizin üçün ən məşhur və dadına baxmağa dəyər olan yeməkləri qısa və aydın şəkildə təqdim edirik:
Tay mətbəxində yeməklər əsasən ədviyyatlı, aromatik və təzə məhsullarla hazırlanır. Əgər siz ədviyyatlı yeməkləri sevirsinizsə, Tayland sizin üçün ideal mətbəxə sahibdir. Ən məşhur yeməklərdən biri Pad Thai-dır. Bu, düyü əriştəsindən hazırlanmış, toyuq, karides və ya tərəvəzlərlə müşayiət olunan bir yeməkdir. Həm dadlı, həm də kifayət qədər yüngül yeməkdir.
Tom Yum isə ədviyyatlı şorba növüdür və adətən karideslə hazırlanır. Əgər siz dəniz məhsullarını xoşlayırsınızsa, bu yemək mütləq dadılmalıdır. Bu şorbanın turş və acı dadı tropik iqlimdə xüsusilə xoş təsir bağışlayır.
Digər məşhur yemək Green Curry (Yaşıl köri)-dir. Ət, hindqozu südü və müxtəlif ədviyyatlarla hazırlanan bu yemək həm doyurucu, həm də Taylandın klassik dadını özündə cəmləyir. Əgər daha yüngül alternativ axtarırsınızsa, Som Tam adlı yaşıl papaya salatına baxa bilərsiniz. Turş, acı və şirin dadların birləşməsi bu salatı Tayland mətbəxinin simvoluna çevirib.
Siz desertlərə maraqlısınızsa, Mango Sticky Rice dadına baxmağı unutmayın. Bu, kokos südü ilə bişmiş yapışqan düyü və təzə manqo ilə təqdim olunur. Həm şirin, həm də təravətli bir desertdir.
Taylandda küçə yeməkləri çox məşhurdur və dadlı olmaqla yanaşı, həm də münasib qiymətlidir. Əgər siz yerli dadları sınaqdan keçirmək istəyirsinizsə, küçə bazarlarında təqdim olunan yeməklərə şans verə bilərsiniz. Hər bölgədə fərqli ləzzətlər tapa bilərsiniz, ona görə də hər şəhərdə yeni yeməklər dadmaqdan çəkinməyin.
Əlavə olaraq, əgər siz vegetarian və ya xüsusi diyetə uyğun qidalanırsınızsa, Taylandda sizin üçün də kifayət qədər seçim var. Çoxlu tərəvəz əsaslı yeməklər, tofu ilə hazırlanmış variantlar və hindqozu südü ilə bişmiş şorbalar mövcuddur.
Görməli Yerlər
Tayland yalnız çimərlik və tətil üçün deyil, həm də zəngin mədəniyyət, tarix və təbiət gözəllikləri ilə tanınır. Əgər siz Taylanda səfər etməyi planlaşdırırsınızsa, bəzi görməli yerləri əvvəlcədən bilmək faydalı olar. Aşağıda Taylandda ziyarət etməyə dəyər olan əsas yerləri təqdim edirik:
Bangkok – paytaxt şəhəri olmaqla yanaşı, həm də Taylandın mədəni və dini mərkəzlərindən biridir. Burada Grand Palace (Böyük Saray) və Wat Phra Kaew kimi müqəddəs məkanlar yerləşir. Şəhərin içindən keçən Chao Phraya çayı boyunca qayıqla gəzinti də fərqli təcrübə təqdim edir.
Chiang Mai – Taylandın şimalında yerləşən bu şəhər sakitliyi, dağ mənzərələri və qədim məbədləri ilə tanınır. Doi Suthep məbədi, həm mənzərə, həm də ruhani atmosfer baxımından çox dəyərli bir yerdir. Əlavə olaraq, bölgədə fil sığınacaqlarını da ziyarət edə bilərsiniz – ancaq etik və heyvanlara zərər verməyən mərkəzləri seçmək vacibdir.
Phuket – Taylandın ən məşhur adasıdır və təmiz çimərlikləri ilə tanınır. Əgər siz istirahət və dəniz mənzərəsini sevirsinizsə, bu ada ideal seçimdir. Buradan Phi Phi adalarına və ya James Bond Island kimi məşhur yerlərə qayıqla turlar təşkil olunur.
Krabi – həm aktiv istirahət, həm də təbiət mənzərələri üçün mükəmməldir. Railay Beach, dağcılar və günəş sevənlər üçün məşhur məkanlardan biridir. Krabi həmçinin gizli mağaralar və təmiz su lagunları ilə tanınır.
Ayutthaya – əgər siz tarixə maraqlısınızsa, bu qədim paytaxt şəhərini ziyarət etməyi unutmayın. Burada yüz illər öncəyə aid olan məbəd qalıqları və Budda heykəlləri Taylandın keçmişini hiss etdirmək baxımından olduqca dəyərlidir.
Pai – Chiang Mai yaxınlığında yerləşən bu kiçik şəhər, sakit atmosferi və dağ mənzərələri ilə fərqlənir. Təbii isti su mənbələri, kanyonlar və kənd həyatını hiss etmək üçün uyğun məkandır.
Təhlükəsizlik və qaydalar
Tayland turistlər üçün təhlükəsiz ölkə sayılır. Sadəcə şəxsi əşyalarına diqqət yetirin. Küçə yeməklərində gigiyenaya fikir verin. Taylandda kral ailəsinə hörmətsizlik qanuni cəza ilə nəticələnə bilər çox ciddi mövzudur. Siqaret çəkmək bəzi ictimai yerlərdə qadağandır (xüsusilə çimərliklərdə).
İnternet və əlaqə
Sim kart almaq çox asandır. Hava limanında və şəhərdə "AIS", "DTAC", "TrueMove" kimi operatorlardan ucuz internet paketləri ala bilərsən. 5-10 dollar ödəməklə 10-20 GB internetli kart əldə etmək mümkündür. eSIM (embedded SIM) - fiziki SIM kartın yerinə keçən virtual SIM kartdır. Cihazınızın daxili yaddaşına yüklənir və aktivləşdirildikdən sonra mobil operatorun şəbəkəsindən istifadə edə bilərsiniz. Airalo, Mobimatter və Tripocell kimi eSIM xidmət təminatçıları, səyahətçilərə və istifadəçilərə müxtəlif ölkələrdə internet bağlantısı təmin edir. Ətraflı məlumat üçün klik edərək esim haqqında olan araştırmamıza göz gəzdirə bilərsiniz.
Nə ilə hərəkət etmək olar?
Tuk-tuk (3-wheeled motorbike taxi) – an interesting option fo
Tuk-tuk (3 təkərli motosiklet taksisi) qısa məsafələr üçün maraqlı seçimdir.
Grab (Asiyanın Uberi) – rahat və təhlükəsizdir.
Moto-taksi - qısa məsafələr üçün sürətli bir yol, lakin diqqətli olun.
Ucuz daxili reyslərlə (30-50 USD) şəhərlərarası səyahət mümkündür
Pul və valyuta
Taylandın valyutası baht (THB)-dır. 1 AZN təxminən 20 baht edir (kurs dəyişə bilər).
Taylandda əsas istifadə olunan pul vahidi baht (THB)-dır. Səfəriniz zamanı pul məsələlərini əvvəlcədən bilmək və düzgün planlamaq çox önəmlidir. Sizi məlumatlandırmaq üçün aşağıdakı vacib məqamları qeyd edirik:
Taylandda gündəlik ödənişlər, alış-veriş, ictimai nəqliyyat və yeməklər üçün əsasən nağd pul istifadə olunur. Xüsusilə kiçik şəhərlərdə və ya küçə satıcılarında kart qəbul olunmaya bilər. Bu səbəbdən bir qədər nağd bahtın üzərinizdə olması tövsiyə olunur.
Valyuta çevirmə məsələsində, hava limanında pul dəyişmək mümkündür, lakin şəhər mərkəzlərindəki valyutadəyişmə məntəqələrində daha sərfəli kurslar təklif olunur. Taylanda gəlməmişdən əvvəl bəzi vəsaiti dollar və ya avro ilə aparmaq, orada isə bahta çevirmək daha sərfəlidir.
Bank kartları əsasən böyük mağazalar, otellər və restoranlarda qəbul olunur. Ancaq bu zaman komissiya tutulması mümkündür. Xüsusilə beynəlxalq kartlarla edilən əməliyyatlarda bank tərəfindən əlavə xərclər tətbiq oluna bilər.
ATM-lər Taylandın hər yerində mövcuddur və həm Visa, həm də Mastercard kartlarını qəbul edir. Lakin ATM-dən nağd pul çıxararkən Tayland bankları tərəfindən təxminən 220 baht (təxminən 10–12 AZN) sabit komissiya tutulur. Odur ki, tək-tək yox, daha böyük məbləğdə pul çıxarmaq daha sərfəlidir.
