Kanada, milyonlarla insanın xəyalını bəzəyən ölkələr arasında özünə möhtəşəm bir yer tutur. Hər il təxminən 50 milyon turist bu ölkəyə səyahət edir. Coğrafiyası, təbiəti, iqlimi və Toronto, Ottava, Monreal, Vankuver kimi böyük şəhərləri, Niaqara şəlaləsi kimi saysız-hesabsız turizm obyektləri ilə Kanada hər kəs üçün “isti səyahət hədəfinə” çevrilib. Kanada vizasını əldə etmək bir çoxları üçün çətin, hətta mümkünsüz görünə bilər. Lakin düzgün prosedurları izləyərək və şansınızı artıran amilləri öyrənərək bu mümkünsüz görünən səyahəti həyata keçirə bilərsiniz! Bu məqalədə sizə bütün müraciət proseslərini və viza alma şansınızı artıracaq nüansları təqdim edirik.
Kanada Viza Növləri
Kanadaya turizm məqsədilə səyahət etmək istəyirsinizsə, Kanada turizm vizasına müraciət etməlisiniz. Bu viza növünə müraciət səbəbləri arasında turizm, ailə və ya dost ziyarəti, işgüzar səfər, tibbi müayinə və ya müalicə, qısamüddətli təhsil, mübadilə proqramları və s. kimi müvəqqəti səbəblər ola bilər. Əgər Kanadada 6 aydan çox müddətə təhsil (bakalavr, magistr, doktorantura və s.) almaq və ya daimi işləmək istəyirsinizsə, təhsil və ya iş qurumlarından rəsmi dəvət və ya qəbul məktublarınız olduğu təqdirdə Kanada milli vizasına (yaşayış icazəsinə) müraciət edə bilərsiniz.
Kanada Turizm Vizası
Kanada turizm vizası “Visitor Visa” adı ilə tanınır. Bu viza çoxgirişlidir və pasportunuzun etibarlılıq müddəti ilə eyni vaxta qədər təqdim olunur. Məsələn, 10 il etibarlılıq müddəti olan pasportunuz varsa, Kanada vizası da 10 il müddətinə verilir. Viza əldə edildikdən sonra Kanadada ardıcıl olaraq maksimum 6 ay qalmaq mümkündür. Çoxgirişli viza olduğu üçün 6 ay sonra ölkəni tərk edib yenidən geri qayıtmaq və növbəti 6 ay qalmaq imkanı var.
Kanada Vizası Müraciəti üçün Tələb Olunan Sənədlər
Kanada vizasına müraciət edərkən aşağıdakı sənədləri təqdim etmək lazımdır:
- Xarici pasportun orijinalı və birinci səhifəsinin surəti
- Əvvəlki vizaların və giriş-çıxış möhürlərinin surətləri (əgər varsa)
- Şəxsiyyət vəsiqəsinin surəti
- İş yerindən arayış* və maaş kartından çıxarış (təhsil alanlar üçün təhsil müəssisəsindən arayış*)
- Adınıza olan bank hesabından arayış* və çıxarış (məbləğ haqqında aşağıda detallı məlumat verilir)
- Mülki vəziyyətinizi təsdiq edən sənəd* (nikah şəhadətnaməsi, uşaqların doğum şəhadətnamələri və ya nikahın pozulması haqqında sənəd)
- 5x4.5 ölçüdə ağ fonda çəkilmiş şəkil
- Avia bileti bronları
- Otel rezervasiyaları
- İngilis dilində doldurulmuş ərizə formaları
- Viza rüsumunun ödənildiyini təsdiq edən sənəd
- İşgüzar səfər üçün vizaya müraciət edilirsə, rəsmi dəvət məktubu
- Mədəniyyət bürosunun məktubu (sponsorluq edilsə)
“*” ilə qeyd olunan sənədlər ingilis dilində təqdim olunmalıdır. Əgər sənədlər azərbaycan dilindədirsə, notarial qaydada ingilis dilinə tərcümə və təsdiq edilməlidir.
Bank hesabınızda olan vəsait Kanadaya səyahət müddətinizdən, seçdiyiniz uçuş və otel rezervasiyalarının dəyərindən, həmçinin digər amillərdən asılı olaraq dəyişə bilər. Ümumilikdə, bir həftəlik səyahət üçün bank hesabınızda minimum 5.000-7.000 AZN və ya bu məbləğin avro və ya ABŞ dolları ekvivalentində olması tövsiyə edilir. Bu məbləğ səyahətinizlə bağlı bütün xərcləri qarşılamalıdır. Xərcləri hesablayarkən biletlərin və otelin qiymətini, həmçinin Kanadada hər gün üçün orta hesabla 70-80 dollar civarında gündəlik xərcinizi nəzərə alıb, daha yüksək bir məbləğ planlaşdırmaq məsləhətdir.
Əgər sahibkarsınızsa, iş yerindən arayış təqdim etmək əvəzinə, aşağıdakı sənədləri səfirliyə təqdim edə bilərsiniz: VÖEN-in surəti, Vergilər Nazirliyindən dövriyyə barədə arayış və şirkətinizin reyestrdən çıxarışı. Əgər işləmirsinizsə, təhsil alırsınızsa və ya səyahət xərclərini qarşılamaq üçün başqa bir şəxsi sponsor kimi göstərirsinizsə, həmin şəxsin şəxsiyyət vəsiqəsinin surəti, iş yerindən arayış (sahibkardırsa, yuxarıdakı sənədlər), bank hesabı arayışı və çıxarışı təqdim edilməlidir. Bank hesabı həm sizin, həm də sponsorun adına ola bilər. Əgər sponsorla ailəvi bağlarınız varsa, bunu təsdiq edən sənəd (məsələn, valideyninizdirsə, doğum haqqında şəhadətnamə, bacı-qardaşdırsa, hər ikinizin doğum haqqında şəhadətnaməsi və s.) və sponsorluq haqqında sənəd də əlavə olunmalıdır. Əgər 18 yaşdan aşağı şəxs səyahət edirsə, hər iki valideynin və ya valideynlərdən birinin yazılı razılıq sənədi də viza müraciəti zamanı təqdim edilməlidir.
Unutmayın ki, VÖEN, Vergilər Nazirliyindən alınmış arayış, şirkətinizin reyestrdən çıxarışı, sponsorluq haqqında sənəd və icazə kağızları kimi sənədlər təqdim edildikdə, bunlar notarial qaydada ingilis dilinə tərcümə olunub təsdiq edilməlidir.
Viza Proseduru
Kanadaya viza müraciəti iki fərqli üsulla edilə bilər: onlayn və kağız üzərində müraciət.
Onlayn Müraciət
Onlayn müraciət prosesində müraciətçi onlayn portalda öz hesabını yaradır. Hesaba daxil olaraq müraciət etdiyi viza növünü seçir, lazım olan sualları cavablandırır və sonrasında tələb olunan sənədlərin (həmçinin ərizə formalarının) siyahısının olduğu səhifə açılır. Bütün sənədlər sistemə yükləndikdən sonra müraciət təsdiqlənir və ödəniş etmək üçün yeni səhifəyə yönləndirilir. Ödəniş onlayn olaraq həyata keçirilir. Bundan sonra isə müraciətçi hesabında növbəti addımlar barədə bildirişləri alır. Bildiriş alındıqda, müraciətçi onu çap edib, pasportu ilə birlikdə ən yaxın viza mərkəzinə gedərək barmaq izi verməlidir.
Barmaq izi verildikdən sonra viza prosesi başlayır. Müraciətçi nəticə barədə bildirişi hesabında alır. Əgər cavab mənfidirsə, imtina səbəbi göstərilir. Müsbət cavab verildiyi təqdirdə, pasportun əsli viza etiketinin yapışdırılması üçün tələb olunur. Müraciətçi bildirişi çap edərək, pasportunu viza müraciət mərkəzinə təqdim edir. Mərkəz pasportu alıb, viza etiketini yapışdırmaq üçün Ankaradakı Kanada səfirliyinə göndərir. Bu proses təxminən 6-8 iş günü çəkir.
Kağız üzərində Müraciət
Kağız üzərində müraciət edərkən, pasport və digər tələb olunan sənədlərin əsli viza müraciət mərkəzinə təqdim olunur. Mərkəz bu sənədləri Kanada Səfirliyinə göndərir. Ərizə formaları elektron şəkildə doldurulub, çap edilir və imzalanır. Bu formalar da sənədlərlə birlikdə təqdim edilir. Eyni zamanda barmaq izi götürülür.
Viza rüsumu onlayn şəkildə ödənilir və ödənişdən sonra alınan çek sənədlərlə birlikdə təqdim edilir.
Viza nəticəsi məlum olduqdan sonra, əgər viza verilibsə, pasport viza etiketi ilə geri qaytarılır. Əgər imtina qərarı verilibsə, pasport imtina bildirişi ilə birlikdə geri alınır.
Ümumiyyətlə, Kanada turist vizasına müraciət prosesi 150-210 iş günü arasında davam edir.
Viza rüsumları aşağıdakı kimidir: 100 CAD (Kanada dolları) səfirliyin rüsumu, 85 CAD biometrik məlumat üçün rüsum və 100 AZN viza müraciət mərkəzinin rüsumu. 100 CAD və 85 CAD rüsumları onlayn ödənilir, 100 AZN rüsum isə viza mərkəzində nağd şəkildə ödənir.
Kanada Vizası Alma Şansı
Kanadaya viza müraciəti edərkən, digər ölkələrin səfirliklərində olduğu kimi, viza alma şansınız sizin profilinizin vəziyyətinə bağlıdır. İş yerinizin və vəzifənizin normal və ya yaxşı olması, aylıq gəlirinizin ortalama maaşdan yüksək olması (təcrübəyə görə, 700-800 AZN arasında aylıq gəlir olan şəxslər üçün dəfələrlə viza alınması mümkün olub), bank hesabınızda səyahətinizi tam şəkildə qarşılaya biləcək məbləğ göstərməyiniz, ölkəyə bağlılıq yaradacaq amillər (adınıza mülk, ailə və uşaqların olması) və yaxşı səyahət tarixçəniz sizin Kanada vizası alma şansınızı artıran faktorlardır.
Əgər əvvəlki dövrlərdə səyahət tarixçəniz yoxdursa, məsələn, Şengen və ya başqa ölkələrin vizaları olmadığı halda Kanada vizasına müraciət etmək riskli ola bilər. Lakin, əgər yaxşı səyahət tarixçəniz varsa və daha əvvəl Şengen, ABŞ, Birləşmiş Krallıq kimi ölkələrdən viza almışsınızsa, bu, Kanada vizasını alma şansınızı əhəmiyyətli dərəcədə artırır. Təcrübəmiz göstərir ki, həmçinin, ABŞ vizanızın aktiv olması, Kanada vizasına müraciət edərkən sizə böyük üstünlük təmin edir.
Kanada Viza Dəstəyi
Biz Vizam.az şirkəti olaraq sizə Kanada vizası müraciətiniz zamanı yardımçı ola bilərik. Bizim viza dəstəyi xidmətimizə aşağıdakılar daxildir:
- Viza mərkəzində sizin adınıza görüş təyini
- Ərizə formalarının doldurulması
- Sənədlərinizin peşəkar şəkildə hazırlanması və sistemə yüklənməsi
- Səyahətinizi əhatə edəcək uçuş biletlərinizin rezervasiyası
- Otellərin bronu və ya sizin istəyinizə uyğun şəkildə alınması
- Viza üçün səyahət tur planınızın hazırlanması
- Konsultasiya və viza prosedurunun izlənilməsi
Eyni zamanda, sənədlərinizin notarial qaydada ingilis dilinə tərcümə və təsdiqi üzrə də kömək edə bilərik. Hər bir sənədin əlavə rüsumu 16 AZN olacaq. Ümumi xidmət haqqımız isə bir nəfər üçün 525 AZN təşkil edir.
20 may 2025 tarixinədək Kanada vizası üçün dəstək xidmətimiz cəmi 95 AZN-dir.
Sifariş yerləşdirmək və ya əlavə məlumat əldə etmək üçün buraya klikləyə və ya 010/50/55-3000135 nömrəsi ilə əlaqə saxlaya bilərsiniz.
Kanada sizə uzaq görünsə də, düzgün addımlarla sizə çox yaxındır! Xoş səyahətlər!
