Avropada yerləşən, öz coğrafiyası və təbiətindən əlavə, tarixi və qədimiliyi, abidələri, şəhərlərinin və küçələrinin memarlığı və dizaynı, Qara dəniz sahilləri ilə bir çox turistin marağını çəkən Balkan ölkəsi Bolqarıstana səyahət etməyiniz üçün yuxarıda sadaladıqlarımızdan da əlavə bir çox səbəb tapa bilərsiniz. Gediş yolu isə çox sadədir: Bolqarıstan vizasına sahib olmaq. Bu viza ilə bağlı bütün məlumatları isə biz sizə bu məqalədə bildirəcəyik.
Bolqarıstan Viza Növləri
Bolqarıstana planladığınız səyahətinizi Bolqarıstan turizm vizası əldə edərək reallaşdıra bilərsiniz. Bu viza növünə müraciət səbəbləri turizm, ailə və ya dostlara ziyarət, işgüzar səfər, tibbi müayinə və ya müalicə, qısamüddətli təhsil, mübadilə proqramları və buna bənzər bir çox daimi olmayan nüanslar ola bilər. Əgər siz Bolqarıstanda müddəti 90 gündən çox olan uzunmüddətli təhsil (bakalavr, magistr, doktorantura və s. kimi) almaq və ya burada yerləşən bir qurumda daimi işləmək istəyirsinizsə, həmin təhsil və iş qurumlarından rəsmi dəvət və ya qəbul məktublarınız olduğu təqdirdə Bolqarıstan milli vizasına da müraciət edə bilərsiniz.
Bolqarıstan Turizm Vizası
Bolqarıstan vizasının təkgirişli və çoxgirişli növləri mövcuddur. Eyni zamanda siz yalnız ilk səfərinizi əhatə edəcək qısamüddətli vizaya və ya çoxgirişli və uzunmüddətli viza növlərinə də müraciət edə bilərsiniz. Bu, sizin səfərinizin məqsədindən və səfər intervalınızdan asılı olaraq dəyişir.
Qeyd edək ki, Bolqarıstan vizası əksər hallarda müraciətçinin viza müraciəti əsnasında ərizə formasında və digər sənədlərində göstərdiyi səyahət müddətinə tam uyğun şəkildə verilir.
Bolqarıstan Avropa Birliyə daxil olub, lakin Şengenə daxil olmayan ölkələrdən biridir. Buna görə də bu ölkəyə səfər etmək üçün Bolqarıstanın öz vizasını almaq lazımdır. Ancaq əlbəttə ki, Bolqarıstan Avropa Birliyinə daxil olduğu üçün aktiv Şengen vizası olan şəxslərə Bolqarıstana daxil olmaq üçün asanlaşdırılmış bir rejim hazırlamışdır. Belə ki, 2012-ci ilin yanvar ayının 31-dən etibarən Bolqarıstan Respublikası Şengen vizası ilə ölkəsində tranzit və ya qısa-müddətli səfər edən şəxslər üçün azad viza rejimi tətbiqi haqda qərar qəbul etdi. Aktiv Şengen viza sahibləri bu viza ilə vizanın etibarlılıq müddəti icazə verdiyi halda 6 ay ərzində maksimum 90 gün Bolqarıstan ərazisində qala bilər. Bu qərarə əsasən, həmiçin Azərbaycan vətəndaşları aktiv çoxgirişli Şengen vizasına sahib olduqları təqdirdə bu viza ilə Bolqarıstan ərazisinə daxil ola və vizanın qüvvədə qaldığı tarix müddətində bu ölkədə maksimum 90 gün qala bilərlər. Ancaq mütləq şəkildə çoxgirişli Şengen vizasına sahib olunmalıdır.
Bolqarıstan Vizası Müraciəti üçün Sənədlər Toplusu
Bolqarıstan vizasına müraciət edərkən siz aşağıdakı sənədləri təqdim etməlisiniz:
- Xarici pasportunuzun orijinalı və birinci səhifəsinin surəti
- Əgər varsa, əvvəlki vizalarınızın və giriş-çıxış möhürlərinizin surətləri
- Şəxsiyyət vəsiqənizin surəti
- İş yerindən arayış* və əgər varsa, maaş kartından çıxarış (təhsil alan şəxslər üçün təhsil müəssisəsindən arayış*)
- Adınıza olan bank hesabından arayış* və çıxarış. (Məbləğ barədə aşağıda detallı məlumat qeyd olunub)
- Əgər varsa, adınıza olan mülklərin çıxarışlarının* və maşınınızın texpasport kopyası
- Əgər ailə üzvünüzlə birlikdə müraciət edirsinizsə, mülki vəziyyətinizin sübutu* (Yoldaşınızla edirsinizsə, nikah haqqında şəhadətnamənizin, Övladınızla edirsinizsə, doğum haqqında şəhadətnaməsinin surəti)
- 2 ədəd 3.5x4.5 ölçüdə, ağ fonda şəkliniz
- Səyahətiniz üçün etdiyiniz aviabilet bronları
- Səyahətiniz üçün etdiyiniz otel rezervasiyaları
- Səfərinizi tam əhatə edəcək və minimum 30.000 EUR dəyəri əhatə edən səyahət sığortası
- İngilis dilində doldurulmuş ərizə forması
- Əgər turistik yox, işgüzar səfərlə bağlı vizaya müraciət olunursa, bu halda həmin iş, tədbir və ya görüşlə bağlı rəsmi dəvət məktubu
Üzərində “*” işarəsi ilə qeyd etdiyimiz sənədlər səfirliyə ingilis dilində təqdim olunmalıdır. Əgər siz sənədin orijinalını ingilis dilində yox, azərbaycanca əldə etmisinizsə, bu halda mütləq şəkildə bu sənədlərin hər biri notarial qaydada ingilis dilinə tərcümə və təsdiq edilərək səfirliyə təqdim olunmalıdır.
Bank hesabınızdakı məbləğ sizin göstərdiyiniz səyahət tarixlərinizdən, yəni Bolqarıstanda qalacağınız müddətdən, bron elədiyiniz uçuş biletləri və otellərin qiymətindən və s. asılı olaraq dəyişir. Ümumilikdə məsləhətdir ki, bir həftəlik səyahət üçün bank hesabınızda minimum 2.000-3.000 AZN (eyni qaydada avro və ya ABŞ dolları ekvivalenti keçərlidir) aralığında məbləğ göstərəsiniz. Bu məbləğ sizin səyahət planınızı tam əhatə etməlidir. Məbləği hesablayarkən bilet və otel bronlarınızın qiyməti ilə ölkə ərazisində qalacağınızı göstərdiyiniz hər gün üçün ortalama 60-70 avro gündəlik xərci cəmləyə və aldığınız rəqəmdən biraz daha yüksəyini nəzərdə tuta bilərsiniz.
Siz əgər, sahibkar kimi fəaliyyət göstərirsinizsə, iş yerindən arayışı əvəz edəcək sənədləri (VÖEN-in surəti, Vergilər Nazirliyindən dövriyyəniz haqqında verilmiş arayış, şirkətinizin reyestrdən çıxarışı) səfirliyə təqdim edə bilərsiniz. Əgər siz işləmirsinizsə, təhsil alırsınıza və ya hər bir halda səfərinizin xərclərini qarşılamaq üçün başqa bir şəxsi sponsor göstərirsinizsə, bu halda həmin şəxsin şəxsiyyət vəsiqəsinin surəti, iş yerindən arayış (əgər sahibkardırsa, yuxarıda sadalanan sənədlər), bank hesabından arayış və çıxarış (bu bank hesabı həm sizin adınıza, həm də sponsorun adına ola bilər), əgər ailəvi bağınız varsa, bunu təsdiq edən sənədi (məsələn, valideyninizdirsə, özünüzün doğum haqqında şəhadətnaməniz, qardaş və ya bacınızdırsa, ikinizin də doğum haqqında şəhadətnamələriniz və s.) və sponsorluq haqqında kağız səfirliyə təqdim olunmalıdır. Əgər müraciət edən şəxs 18 yaşdan aşağıdırsa, bu halda tək səyahət etdiyi halda hər iki valideynindən və ya valideynlərindən biri ilə səyahət etdiyi halda isə digər valideynindən ölkədən çıxmasına dair icazə sənədin surətini də viza müraciəti zamanı təqdim etmək lazımdır.
Qeyd edək ki, VÖEN, Vergilər Nazirliyindən dövriyyə haqqında arayış, şirkətinizin reyestrdən çıxarışı və ya sponsorluq kağızı, icazə kağızı kimi sənədləri təqdim etdiyiniz halda da bu sənədlərin hər birini notarial qaydada ingilis dilinə tərcümə və təsdiq etdirməlisiniz.
Viza Proseduru
Əgər şəxsin aktiv çoxgirişli Şengen vizası yoxdursa, bu halda Bolqarıstan vizası almalıdır. Bunun üçün Bolqarıstanın Bakıdakı Səfirliyinə müraciət olunur. Qərar səfirliyin konsulluq şöbəsində konsul tərəfindən verilir.
Sənədləri təhvil vermək üçün əvvəlcədən görüş təyini mütləqdir.
Viza proseduru qısamüddətli vizalar üçün 5-15 iş günü, uzunmüddətli vizalar üçün isə minimum 30 iş günü çəkir.
Viza rüsumu isə bir nəfər üçün 35 avro olaraq nəzərdə tutulub. Əgər siz, uzunmüddətli vizaya müraciət etmək istəyirsinizsə, bu halda səfirliyə ödəyəcəyiniz rüsum 100 avro olaraq təyin edilib. Rüsum sənədləri təqdim edərkən nağd şəkildə, avro ilə ödənilir.
Bolqarıstan Vizası Alma Ehtimalı
Bütün ölkələrin səfirliyinə viza müraciəti edərkən olduğu kimi Bolqarıstanda da sizin viza alma şansınız profilinizin hansı vəziyyətdə olmasından asılıdır. İş yerinizin və vəzifənizin normal olması, aylıq gəlirinizin standart maaş aralığında olması (təcrübədə 300-500 AZN aralığında aylıq gəliri olan şəxslərə viza alınması halı dəfələrlə yaşanıb), bank hesabınızda bütün səyahətinizi əhatə etməyə yetəcək qədər məbləğ göstərməyiniz, sizi ölkəyə bağlayan nüansların (adınıza mülkün olması, ailənizin və uşaqlarınızın olması) mövcudluğu və səyahət tarixçənizin olması sizin Bolqarıstan vizası alma şansınızı artıran faktorlardır. Daha öncə səyahət tarixçəsi olmamış, yəni Şengen və ya digər viza sahibi olmayan şəxslər üçün Bolqarıstan səfirliyi riskli səfirlik hesab olunmur. Təcrübəmizdə ilk vizalarını məhz bu səfirlikdən almış çox sayda müraciətçi olmuşdur. Əlbəttə, bunun üçün sizin digər bütün sənədləriniz qaydasında olmalıdır. Həmçinin, hər bir halda sizin daha öncə vizalarınızın olması Bolqarıstan vizası alma ehtimalınızı yüksəldən faktorlardan biridir.
Bolqarıstana Viza Dəstəyi
Biz Vizam.az şirkəti olaraq sizə Bolqarıstan vizası müraciətiniz zamanı yardımçı ola bilərik. Əgər siz bizim viza dəstəyi xidmətimizdən istifadə etsəniz, bizim xidmətə səfirlikdə sizin adınıza görüş təyin olunması, ərizə formanızın doldurulması, sənədlərinizin peşəkar qaydada hazırlanması, səyahətinizi əhatə edəcək uçuş biletlərinizin rezervasiyası, otellərin bronu və ya istəyinizə uyğun şəkildə alınması, viza üçün səyahət tur planınızın qurulması, səfərinizi əhatə edəcək səyahət sığortasının edilməsi, konsultasiya, viza prosedurunuzun izlənilməsi daxil olacaq. Qeyd edək ki, səyahət sığortasının rüsumu bizim xidmət haqqıdan əlavə hesablanacaq. Sığortanın rüsumu adətən, 1 həftə üçün 16-18 AZN aralığında olur. Bu sığortanı siz özünüz də etdirə bilərsiniz. Həmçinin biz sizə sənədlərinizin notarial qaydada ingilis dilinə tərcümə və təsdiq olunması ilə də bağlı yardımçı ola bilərik. Hər bir sənəd üçün əlavə rüsum 16 AZN təşkil edəcək. Ümumi olaraq isə bizim şirkətimizdə Bolqarıstan səyahət vizasına dəstək xidmət haqqısı bir nəfər üçün 49 AZN təşkil edir.
Sifarişinizi yerləşdirmək üçün buraya klikləyə, əlavə məlumat almaq üçün 050/55-3000135 nömrələri ilə əlaqə saxlaya bilərsiniz.
Xoş səyahətlər!
